Türkmenistanyň DIM-niň Halkara gatnaşyklary institutynda Türkmenistanyň Bitaraplygyna bagyşlanan ylmy maslahat geçirildi

          2015-nji ýylyň 24-nji ýanwarynda Türkmenistanyň Daşary işler ministrliginiň Halkara gatnaşyklary institutynda 2015-nji ýyly Bitaraplyk we Parahatçylyk ýyly diýlip yglan edilmegine bagyşlanan “Türkmenistanyň Bitaraplygy: parahatçylygyň, ählumumy howpsuzlygyň we durnukly ösüşiň hatyrasyna hyzmatdaşlyk” atly ylmy maslahat geçirildi.           Oňa ýurdumyzyň diplomatik gullugynyň işgärleri, daşary ýurtlaryň biziň ýurdumyzda işleýän diplomatik missiýalarynyň we halkara guramalarynyň wekilhanalarynyň ýolbaşçylary, daşary ýurtly žurnalistler, milli habar beriş serişdeleriniň wekilleri hem-de ýurduň ýokary okuw mekdepleriniň professor-mugallymlary we talyplary gatnaşdylar.           Maslahatdaky çykyşlarda nygtalyşy ýaly, ýurdumyzyň “açyk gapylar” syýasaty, özara bähbitli hyzmatdaşlyga taýýarlyk, oňyn dünýä tejribesini kabul etmeklik we sebit hem-de dünýä meselelerini çözmekde işjeň parahatçylyk söýüjilikli çemeleşmegi Türkmenistanyň içeri we daşary syýasatynyň üstünlikli amala aşyrylmagynyň möhüm şertleri bolup çykyş edýär.           Çyklyş edenleriň pikirine görä, Türkmenistan döwletiniň Bitaraplygy sebit hem-de dünýä derejesinde durnukly ösüşiň üpjün edilmeginiň möhüm şertleriniň biri bolup çykyş edýär. Ýurdumyzyň bitaraplygynyň hukuk esaslary döwletara hyzmatdaşlygyny ýola goýmakda, ýurtlaryň arasynda özara düşünişmegiň hem-de oňyn goňşuçylyk gatnaşyklaryny ösdürmegiň möhüm guraly hökmünde iňňän ýokary baha mynasyp boldy.           Bu maslahat Türkmenistanda we daşary ýurtlarda bütin ýylyň dowamynda geçiriljek 2015-nji ýyly Bitaraplyk we Parahatçylyk ýyly diýlip yglan edilmegine bagyşlanan syýasy we durmuş-maglumat ähmiýetli çäreler toplumynyň başlangyjy bolup durýar.           Maslahatyň ahyrynda oňa gatnaşyjylar türkmen halkynyň bagtly ýaşamagy üçin, Garaşsyz Türkmenistana ýokary abraýa we dünýä jemgyýetçiliginiň hormat-sarpasyna mynasyp eden oňyn başlangyçlar we teklipler üçin, hormatly Prezidentimize alkyşlaryny beýan etdiler we mähriban Arkadagymyzyň Watanymyzyň gülläp ösmegi ugrunda alyp barýan ägirt uly işlerinde täze üstünlikleriň ýaran bolmagyny arzuw etdiler.