KOREÝA RESPUBLIKASYNYŇ WEKILIÝETI AŞGABATDA GEÇIRILEN MEDENI ÇÄRELERE GATNAŞDY

2024-nji ýylyň 17-18-nji maýynda Aşgabatda türkmen halkynyň nusgawy şahyry hem akyldary Magtymguly Pyragynyň doglan gününiň 300 ýyllygyna bagyşlanyp medeniýet ministrleriň halkara maslahatyna we onuň çäklerinde geçirilen giňgerimli çärelere Koreýa Respublikasynyň Milli Aziýa medeni merkeziniň Prezidenti Li Kaň Hýonyň ýolbaşçylygyndaky wekiliýet gatnaşdy.

Halkara maslahatyň dowamynda çykyş etmek bilen, wekiliýetiň ýolbaşçysy Türkmenistan bilen Koreýa Respublikasynyň arasyndaky ýola goýlan medeni-ynsanperwer hyzmatdaşlygyň netijeli ösdürilýändigini aýratyn belledi. Özüniň eserleri bilen umumadamzat edebi hem medeni hazynasyna ebedilik giren beýik türkmen şahyry we akyldary Magtymguly Pyragynyň doglan gününiň şanly senesine bagyşlanan çäreleriň iki dostlukly ýurtlaryň arasyndaky gatnaşyklaryň mundan beýläk hem çüňlaşdyrylmagynda uly ähmiýete eýe bolýandygy barada nygtaldy.