Seulda howanyň üýtgemegi we tokaýlaşdyrmak bilen bagly meseleler ara alnyp maslahatlaşyldy

2024-nji ýylyň 16-17-nji oktýabrynda Türkmenistanyň Daşky gurşawy goramak ministriniň orunbasary N.Jumaşowyň Ählumumy Ýaşyl ösüş institutynyň (Global Green Growth Institute) guramagynda Bütindünýä ýaşyl ösüş hepdeligi atly geçirilen çäreleriň çäklerinde Koreýa Respublikasynyň Daşary işler ministrliginiň we bu institutyň wekilleri bilen duşuşyklary geçirildi.

Hususan-da, 16-njy oktýabrda günüň ikinji ýarymynda Koreýa Respublikasynyň Daşary işler ministriniň Howanyň üýtgemegi boýunça meselelere jogapkär orunbasary jenap Kiýoň Çaň bilen duşuşyk geçirildi. Geçirilen duşuşygyň dowamynda taraplar howanyň üýtgemegi bilen ýurtlarymyzda döreýän oňaýsyz şertleriň öňüni almak, Birleşen Milletler Guramasynyň Howanyň üýtgemegi boýunça Çarçuwaly konwensiýasyna gatnaşyjy taraplaryň şu ýylyň 11-22-nji noýabry aralygynda Baku şäherinde geçirilmegi meýilleşdirilýän 29-njy maslahatyna (COP29) gatnaşmak boýunça görülýän taýýarlyk işleri, galyberse-de Aşgabat şäherinde Merkezi Aziýada howanyň üýtgemegi bilen baglanyşykly tehnologiýalar sebit merkezini döretmek boýunça Türkmenistanyň başlangyjy barada özara pikir alyşdylar.

Şeýle hem, 17-nji oktýabrda türkmen wekiliýetiniň Ählumumy Ýaşyl ösüş institutynyň häzirki baş direktory Frank Rijsberman bilen ikitaraplaýyn duşuşygy geçirildi.

Gepleşikleriň dowamynda taraplar ýaşyl ösüş üçin täze usullary we tehnologiýalary ornaşdyrmak boýunça tejribe alyşmak arkaly hyzmatdaşlygy güýçlendirmek, şeýle hem Türkmenistanda döredilen tokaý zolaklarynyň daşky gurşawa ýetirýän täsirini öwrenmek we tokaýlary durnukly dolandyrmak üçin mehanizmi gowulandyrmak üçin bilelikde hyzmatdaşlyk etmek barada pikir alyşdylar.

Mundan başga-da, ýurdumyzyň tebigy ekoulgamlaryny we toprak-howa şertlerini göz öňünde tutup, tokaý hojalyklarynda hem-de döwlet tebigy goraghanalarynda ýerleşdiriljek bag nahallarynyň görnüşlerini we möçberlerini artdyrmak boýunça häzirki wagtda işlenilýän taslamalary amala aşyrmak we olara maliýe serişdelerini çekmek babatda Ählumumy Ýaşyl ösüş instituty bilen hyzmatdaşlygy işjeňleşdirmek barada ylalaşyldy.