Türkmen wekiliýeti 17-nji «Merkezi Aziýa - Koreýa Respublikasy» hyzmatdaşlyk forumyna gatnaşdy

2024-nji ýylyň 4-nji noýabrynda Seul şäherinde 17-nji «Merkezi Aziýa - Koreýa Respublikasy» hyzmatdaşlyk forumy geçirildi. Oňa Türkmenistanyň  Koreýa Respublikasyndaky Ilçisi B.Durdyýew gatnaşdy. Bu Foruma Koreýa Respublikasynyň Daşary işler ministri Ço The Ýol baştutanlyk etdi. Oňa Gazagystan Respublikasynyň Premýer-ministriniň orunbasary, Daşary işler ministri Myrat Nurtleuň, Özbegistan Respublikasynyň Daşary işler ministri Bahtiýor Saidowyň, Gyrgyzystan Respublikasynyň Daşary işler ministriniň birinji orunbasary Asein Isaýewiň, Täjigistan Respublikasynyň Daşary işler ministriniň orunbasary Imomi Sodikiň ýolbaşçylygyndaky wekiliýetler hem gatnaşdy.

Türkmenistanyň Koreýa Respublikasyndaky Ilçisi B.Durdyýew forumda çykyş etmek bilen, döwletimiziň «Merkezi Aziýa - Koreýa Respublikasy» hyzmatdaşlyk forumynyň çäklerinde giň gerimli gatnaşyklary ýola goýmagyň tarapdarydygyny nygtamak bilen, mundan beýläk hem ykdysadyýet, ulag-logistika, ylym-bilim, lukmançylyk, syýahatçylyk, sanlylaşdyrma, ýokary tehnologiýalar, daşky gurşawy goramak, önümçilik, oba hojalygy, medeni-ynsanperwer ýaly wajyp ugurlar boýunça gatnaşyklary ösdürmäge ähli mümkinçilikleriň bardygyny belledi.

Foruma gatnaşyjylar Merkezi Aziýa ýurtlarynyň we Koreýa Respublikasynyň parlamentleriniň ýolbaşçylarynyň 2024-nji ýylyň 14-nji oktýabrynda Aşgabatda geçirilen ikinji duşuşygynyň oňyn netijelerine üns çekdiler.

Forumyň esasy mejlisi tamamlanandan soňra, “Üpjünçilik zynjyry”, “Daşky gurşaw”, “Sanlylaşdyrmak” we “Syýahatçylyk” atly mowzuklar boýunça 4 sany gibrid görnüşde sessiýalar geçirildi. Bu sessiýalara Türkmenistanyň degişli ministrlikleriniň we pudak edaralarynyň wekilleri onlaýn görnüşde gatnaşdylar.

17-nji «Merkezi Aziýa - Koreýa Respublikasy» Hyzmatdaşlyk forumynyň netijeleri boýunça Bilelikdäki beýannamasy hem-de Forumyň Sekretariatynyň 2025-nji ýyl üçin Iş maksatnamasy kabul edildi.

Forumyň çäklerinde Koreýa Respublikasynyň Daşary işler ministrliginiň we Merkezi Aziýa ýurtlarynyň diplomatik wekilhanalarynyň gatnaşamagynda, ýurtlaryň milli aýratynlyklaryny şöhlelendirýän sergiler hem guraldy.

Günüň ikinji ýarymynda 17-nji “Merkezi Aziýa-Koreýa Respublikasy” hyzmatdaşlyk Forumyna gatnaşýan wekiliýet ýolbaşçylarynyň Koreýa Respublikasynyň Prezidenti Ýun Sok Ýol bilen bilelikdäki duşuşygy geçirildi.

Duşuşygyň başynda Koreýa Respublikasynyň Prezidenti wekiliýet ýolbaşçylaryna bu Forumyň işine gatnaşýandygy üçin minnetdarlyk bildirip, Merkezi Aziýa-Koreýa Respublikasy formatdaky hyzmatdaşlygyň soňky ýyllarda wajyplygynyň has hem artýandygy barada belledi. Merkezi Aziýa sebitiniň giň ulag-üstaşyr mümkinçilikleriniň bu sebitiň strategiki ähmiýetini ýokarlandyrýandygyny aýtmak bilen, Ýun Sok Ýol Koreýa Respublikasynyň Merkezi Aziýa ýurtlary bilen syýasy-diplomatik, ykdysady we medeni gatnaşyklary çuňlaşdyrmaga taýýardygy barada nygtady. Sözüni dowam etmek bilen Prezident Ýun Sok Ýol türkmen, gazak we özbek wekiliýetleriniň ýolbaşçylaryna 2024-nji ýylyň iýun aýynda özüniň bu ýurtlara amala aşyran döwlet saparynyň dowamynda görkezilen myhmansöýerlik üçin minnetdarlyk bildirip, bu saparlaryň dowamynda gazanylan ylalaşyklary durmuşa geçirmäge koreý tarapynyň taýýardygy barada mälim etdi. Galyberse-de, ýokarda agzalan saparlaryň öňüsyrasynda yglan edilen “K-Silk ROAD” başlangyjynyň we Merkezi Aziýa-Koreýa Respublikasy birinji Sammitini geçirmek teklibiniň bu ýurtlaryň ýolbaşçylary tarapyndan goldaw tapandygy üçin öz hoşallygyny bildirdi.

Şeýle hem, Koreý Respublikasynyň Prezidenti türkmen tarapyna ýüzlenip, Türkmenistanyň hormatly Prezidenti Serdar Berdimuhamedowa hem-de hormatly Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowa özüniň mähirli salamlaryny ýetirmegi haýyş etdi.

Şunuň bilen birlikde, Forumyň işiniň çäklerinde 2024-nji ýylyň 5-nji noýabrynda «Merkezi Aziýa - Koreýa Respublikasy» işewürler geňeşiniň nobatdaky 5-nji mejlisi geçirilýär.