V Aziýa oýunlaryna bagyşlanan diplomatlaryň arasynda stol üstünde oýnalýan tennisiň dostlukly ýaryşy geçirildi

Türkmenistanyň Koreýa Respublikasyndaky Ilçihanasynda Ýapyk binalarda we söweş sungaty boýunça V Aziýa oýunlaryna bagyşlanan diplomatlaryň arasynda stol üstünde oýnalýan tennisiň dostlukly ýaryşy geçirildi

Türkmenistanyň Koreýa Respublikasyndaky Ilçihanasynyň başlangyjy esasynda, 2017-nji ýyly Sagdynlygyň we ruhubelentligiň ýyly diýlip yglan edilmegi esasynda hem-de Ýapyk binalarda we söweş sungaty boýunça V Aziýa oýunlarynyň geçirilmegi mynasybetli 2017-nji ýylyň 8-nji aprelinde Ilçihananyň edara binasynyň daşky meýdanynda Koreýa Respublikasynda akkreditirlenen daşary ýurtly wekilhanalarynyň diplomatlary arasynda stol üstünde oýnalýan dostlukly tennis ýaryşy geçirildi.

Bäsleşige Azerbaýjan Respublikasynyň, Bolgariýa Respublikasynyň, Gazagystan Respublikasynyň, Gyrgyz Respublikasynyň, Täjigistan Respublikasynyň, Özbegistan Respublikasynyň we Ukrainanyň Ilçihanalarynyň ýolbaşçylary we dürli derejeli diplomatlary, hem-de birnäçe ýerli habar beriş serişdeleriniň wekilleri hem gatnaşdylar. Mundan başga-da, agzalan çärä Merkezi Aziýa ýurtlarynyň işlerini alyp barýan Koreýa Respublikasynyň Daşary işler Ministrliginiň birnäçe wekilleri hem gatnaşdy.

Ýaryş başlamazdan ozal, Türkmenistanyň Ilçihanasynda daşary ýurtly diplomatik wekilhanalarynyň,Koreýa Respublikasynyň Daşary işler Ministrliginiň hem-de ýerli habar beriş serişdeleriniň gatnaşmagynda şu ýylyň sentýabr aýynda geçirilmegi meýilleşdirilýän Ýapyk binalarda we söweş sungaty boýunça V Aziýa oýunlaryna taýýarlyk işlerine hem-de Türkmenistanda we onuň daşynda bu taryhy waka bagyşlanyp geçirilýän, şeýle hem 2017-nji ýyly Sagdynlygyň we ruhubelentligiň ýyly diýlip yglan edilmegi mynasybetli gurnalýan dürli sport çärelerine degişli gysga brifing geçirildi. Şol bir wagtda, gatnaşyjylar ýurdumyzyň Garaşsyzlyk döwrüniň içinde syýasy, söwda-ykdysady, sosial we medeni-gumanitar taýdan gazanan esasy üstünlikler bilen tanyşdyryldy.

Şu ýylyň dowamynda Türkmenistan bilen Koreýa Respublikasynyň arasynda diplomatik gatnaşyklarynyň ýola goýulmagynyň şanly 25 ýyllygynyň bellenilmegi barada aýdylanda, iki ýurduň arasyndaky hemmetaraplaýyn we özara bähbitli gatnaşyklarynyň derejesiniň ýokarydygy aýratyn belläp geçildi.

Soňra tennis ýaryşy başlandy. Ýaryş iki tapgyrda geçdi. Bäsleşigiň netijesinde ýeňijä Çempion kubogy hem-de Diplomatlaryň arasynda geçirilen stol üstünde oýnalýan tennis ýaryşynyň ýeňijisi diýlen ýörite Şadatnama gowşuryldy. Beýleki gatnaşyjylara bolsa basleşigiň hormatly gatnaşyjysy diýip şadatnamalar dabaraly ýagdaýda gowşuryldy.

Tennis ýaryşynyň soňunda gatnaşyjylara Ilçihana tarapyndan taýýarlanan Türkmen milli tagamlarynyň dürli görnüşleri hödür edildi.

Çäreleriň dowamynda gatnaşyjylaryň arasynda geljekki Ýapyk binalarda we söweş sungaty boýunça V Aziýa oýunlaryna bagyşlanyp çap edilen dürli maglumatlar, şol sanda bu ugurdaky ýörite press-relizi we Ilçihananyň başlangyjy esasynda öň çapdan çykarlan hem-de Türkmenistanyň hormatly Prezidenti Gurbanguly Berdimuhamedowyň ýolbaşçylygynda ýurdumyzyň içerki we daşarky syýasatynda durmuşa geçirilýän özgertmelere we üstünliklere bagyşlanan ýerli habar beriş serişdeleriniň žurnallarynyň birnäçesi paýlandy.