YHG-nyň Daşary işler ministrleriniň geňeşiniň 29-njy mejlisi geçirildi

photo

2025-nji ýylyň 28-nji noýabrynda wideoaragatnaşyk ulgamy arkaly Ykdysady Hyzmatdaşlyk Guramasynyň (YHG) Daşary işler ministrleriniň geňeşiniň 29-njy mejlisi geçirildi. Mejlise Daşary işler ministriniň orunbasary Ahmet Gurbanowyň ýolbaşçylygyndaky Türkmenistanyň wekiliýeti gatnaşdy.

Mejlis Gazagystan Respublikasynyň başlyklyk etmeginde geçirilip, YHG-a agza döwletleriň arasynda köpugurly hyzmatdaşlygy ösdürmegiň möhüm meselelerini ara alyp maslahatlaşmaga gönükdirildi.

Çärede YHG-a agza döwletleriň arasyndaky gatnaşyklary mundan beýläk-de ösdürmegiň meseleleri, sebit hyzmatdaşlygyny kämilleşdirmegiň gurallary hem-de Guramanyň işiniň netijeliligini ýokarlandyrmak boýunça meseleler giňden ara alnyp maslahatlaşyldy. Şeýle hem Baş sekretaryň hasabatyna, degişli ministrler duşuşyklarynyň we YHG-nyň ýöriteleşdirilen düzümleriniň mejlisleriniň netijelerine aýratyn üns berildi.

Mejlisiň gün tertibiniň esasy meseleleriniň biri «Ykdysady hyzmatdaşlygyň strategik maksatlary–2035» taslamasyna garamak boldy. Türkmen tarapy çemeleşmeleriň iş ýüzündäki mümkinçiliklerini, taslamalaýyn esasyny hem-de durmuşa geçirilişiniň amaly mehanizmlerini hasaba almak bilen, resminamanyň üstünde mundan beýläk-de işi dowam etmegiň zerurdygyny aýtdy. Şunuň bilen baglylykda, ECO Vision 2025 Konsepsiýasynyň geçiş döwri üçin möhletiniň uzaldylmagynyň maksadalaýyklygy goldanyldy.

Öz çykyşynda A.Gurbanow ulag-üstaşyr we logistika arabaglanyşygyny ösdürmegiň, üstaşyr geçirmelerini sanlylaşdyrylmagyň we sebitleýin infrastruktura gatnaşyklaryny berkitmegiň ileri tutulýan ugurlardygyny nygtady. Agza döwletleriň bilelikdäki taslamalaryny utgaşdyrmak we halkara hyzmatdaşlygyny giňeltmek üçin Türkmenistanyň BMG-niň Durnukly ulag boýunça onýyllygyny (2026 –2035-nji ýyllar üçin) yglan etmek hakyndaky başlangyjynyň ähmiýeti bellenildi.

Mejlisiň dowamynda ekologik durnuklylyk we “ýaşyl” özgeriş boýunça meseleler hem ara alnyp maslahatlaşyldy. Türkmen tarapy sebitleýin ekologiýa başlangyçlaryna, şol sanda BMG-niň howandarlygynda Çölleşmäge garşy göreşmek boýunça sebitleýin merkezi we Howanyň üýtgemegi bilen bagly tehnologiýalar boýunça sebit merkezini döretmäge aýratyn ünsi çekdi. Halkara maliýe guramalary we BMG ulgamynyň düzümleri bilen işjeň gatnaşyklaryň zerurdygy hem nygtaldy.

Söwda-ykdysady hyzmatdaşlygy ösdürmek, hususy pudagy goldamak, söwdanyň sanly gurallaryny ornaşdyrmak hem-de ynsanperwer ulgamda hyzmatdaşlygy berkitmek ýaly meselelere hem aýratyn orun berildi.

Mejlisiň netijeleri boýunça Guramanyň işi bilen bagly guramaçylyk we maliýe meselelerine garaldy, şeýle hem YHG-nyň çäklerinde bilelikdäki taslamalary ösdürmek boýunça mundan beýläkki ädimler ylalaşyldy. YHG-nyň Daşary işler ministrleriniň geňeşiniň nobatdaky mejlisini 2026-njy ýylda geçirmek meýilleşdirilýär.